Anil Chavda
5 Books / Date of Birth:- 10-05-1985
અનિલ ચાવડા એ લેખક, કવિ, અને કટારલેખક છે. સવાર લઈને (2012) ગઝલસંગ્રહ માટે તેમને દિલ્હી સાહિત્ય એકેડેમી દ્વારા ‘યુવા ગૌરવ પુરસ્કાર - 2014’ દ્વારા સન્માનિત કરવામાં આવ્યા હતા. તે ઉપરાંત ‘શયદા એવોર્ડ 2010’, ગુજરાત સાહિત્ય એકેડેમીનો 2013માં યુવા ગૌરવ પુરષ્કાર અને ગુજરાત સમાચાર અને સમન્વયનો ‘રાજીવ પટેલ એવોર્ડ’ મળ્યો છે. ‘એક હતી વાર્તા’ એ તેમની ટૂંકી વાર્તા સંગ્રહ છે. તેઓ દૂરદર્શન અને ઓલ ઇન્ડિયા રેડીયોના ઘણાં ટીવી અને રેડીયોના કાર્યક્રમોમાં આવી ગયા છે. તેમનો જન્મ લખતર તાલુકાના કરેલા ગામે (સુરેન્દ્રનગર) થયો હતો. અનિલ ચાવડાએ કોલેજના દિવસોથી કવિતાઓ લખવાની શરૂઆત કરી અને તે ચિનુ મોદી, આદિલ મન્સૂરી, સિતાંશુ યશાસ્ચંદ્ર અને લાભશંકર ઠાકરથી પ્રભાવિત હતા. 2004માં ગુજરાતી કવિતા સામયિક ‘કવિલોક’માં તેમની ગઝલ પહેલી વખત પ્રકાશિત થઈ હતી. પછી તેમની રચનાઓ “ગઝલવિશ્વ, ધબક, પરિવેશ, શબ્દસૃષ્ટિ, કવિલોક, કુમાર, નવનીત સમર્પણ, પરબ, શબ્દસર અને તાદર્થ્ય” માં પ્રકાશિત થતી રહી. 2014થી તેમણે 'સંવેદના સમાજ' માસિક ગુજરાતી સામાયિકમાં અમલીકરણ સંપાદક તરીકે કામ કર્યું. 2014થી દર રવિવારે સંદેશ છાપામાં તેમની 'મનની મોસમ' નામે કોલમ આવતી હતી. હાલમાં તેઓ ગુજરાત સમાચારમાં 'અંતરનેટની કવિતા' નામે કોલમ લખે છે. 15 ફેબ્રુઆરી, 2012માં તેમનો પહેલો ગઝલ સંગ્રહ 'સવાર લઈને' પ્રકાશિત થયો અને રઘુવીર ચૌધરી, ચિનુ મોદી, ચંદ્રકાન્ત શેઠ, રાધેશ્યામ શર્મા, અને ચંદ્રકાન્ત ટોપીવાળા જેવા લેખકો – વિવેચકોએ ખૂબ વખાણ્યો. તેમણે 19 પુસ્તકોનું ભાષાંતરણ કર્યું છે. અનિલ ચાવડાની પ્રથમ નવલકથા 'રેન્ડિયર્સ' નું અમદાવાદ ઇન્ટરનેશનલ લિટરેચર ફેસ્ટિવલ ‘હોટેલ હયાત’ ખાતે વિમોચન થયું હતું, જેમાં શાળા જીવનના અનુભવો સુંદર રીતે આલેખન પામ્યા છે.  

Showing all 5 results