Brian Tracy
8 Books / Date of Birth:- 05-01-1944
જાણીતા પ્રૉફેશનલ સ્પીકર, ટ્રેઇનર અને કન્સલ્ટન્ટ બ્રાયન ટ્રેસી અમેરિકામાં કેલિફોર્નિયાના સોલાન બીચ ખાતે બ્રાયન ટ્રેસી ઇન્ટરનૅશનલ નામની ટ્રેઇનિંગ અને કન્સલ્ટિંગ કંપની ચલાવે છે. પોતાની મહેનત દ્વારા જ બ્રાયન ટ્રેસીએ કરોડો ડૉલરનું સામ્રાજ્ય જમાવ્યું છે. જીવનના પાઠ પોતે બહુ અઘરી રીતે ભણ્યા છે. ગ્રૅજ્યુએશન પૂરું કર્યા વિના જ હાઈસ્કૂલ છોડી દીધી હતી. તે પછી એક કામદાર તરીકે વર્ષો સુધી કામ કરતા રહ્યા. અડધી વીસી વટાવી ગયા પછી તેમણે સેલ્સપર્સન બનવાનું નક્કી કર્યું. તેમાં સફળતા મળી અને ઝડપથી પ્રગતિ થવા લાગી. દર વર્ષે તેઓ પ્રગતિનું એક પછી એક સોપાન સર કરતા ગયા. આ દરમિયાન તેઓ સફળતા પ્રાપ્તિ માટે જરૂરી જુદી જુદી મેથડ્સ, ટૅક્નિક્સ અને પદ્ધતિઓનો અભ્યાસ કરતા રહ્યા અને તેમાં નિપુણતા પ્રાપ્ત કરીને આખરે એક વિશાળ ડેવલપમેન્ટ કંપનીના CEO બની શક્યા. ત્રીસીમાં પહોંચ્યા પછી તેમણે અધૂરો છોડેલો અભ્યાસ પૂરો કરવા આલ્બર્ટા યુનિવર્સિટીમાં પ્રવેશ લીધો. બાદમાં એન્ડ્રુ જેક્સન યુનિવર્સિટીમાંથી બિઝનેસ એડમિનિસ્ટ્રેશનમાં માસ્ટર્સ ડિગ્રી મેળવી. આજે તેમનાં પુસ્તકો, ઓડિયો પ્રોગ્રામ્સ અને વીડિયો સેમિનાર દુનિયાભરમાં લોકપ્રિય બન્યાં છે અને 35 ભાષાઓમાં તેનો અનુવાદ થયો છે. તેમણે પોતાના પુસ્તકમાં વર્ણવેલા સફળતાના સિદ્ધાંતોને પોતાના જીવનમાં અજમાવ્યા છે અને તે પછી જ સિદ્ધાંતોના અમલની ભલામણ કરી છે. તેમણે પોતાને જે રીતે હતાશામાંથી બહાર કાઢ્યા તે રીતે હજારો લોકોને નિરાશામાંથી બહાર કાઢીને તેમના જીવનને ઉત્સાહથી ભરી દીધું છે. બ્રાયન ટ્રેસી પોતાને કોઈ વિદ્વાન સંશોધક સમજતા નથી, પરંતુ અનુભવમાંથી ઘડાયેલા અને માહિતીને એકઠી કરીને તેને ઉપયોગમાં લાવનાર એક પ્રયોગશીલ તરીકે જુએ છે. ચારે દિશામાંથી પ્રાપ્ત થતાં માહિતી અને જ્ઞાનને બ્રાયન પોતાના અનુભવોના ત્રાજવામાં તોલે છે. અન્યના અનુભવોને પણ ચકાસે છે અને તે પછી તેને નવા સ્વરૂપમાં રજૂ કરે છે. તેમનાં 40થી વધુ પુસ્તકો પ્રગટ થયાં છે અને તેમાંથી મોટા ભાગનાં બેસ્ટસેલર સાબિત થયાં છે. તેમના 300થી વધુ ઓડિયો અને વીડિયો પ્રોગ્રામ્સ પણ ઉપલબ્ધ છે. સાન ડિયેગોના ગોલ્ફ કોર્સમાં રહેતા બ્રાયન સુખી ઘર ગૃહસ્થી ધરાવે છે તેમને ચાર સંતાનો છે. દર વર્ષે 100થી વધુ જગ્યાએ સેમિનાર વગેરે માટે દુનિયાભરમાં તેઓ ફરતા રહે છે. 17 દેશોમાં તેમની કંપનીની શાખાઓ આવેલી છે. સફળતા અને ધ્યેય પ્રાપ્તિની તાલીમ આપનાર એક સૌથી સફળ માર્ગદર્શક તરીકે તેમની આબરૂ જામેલી છે.